上半场基本系广州足协占优，但先开记录嘅系恒大足校，原因在于广州足协嘅门将同两个中卫嘅表现比较差。
上半场恒大有威胁嘅攻势全部都系打身后造成嘅。广州足协果个失球就系典型。恒大直接打身后，而单前锋李明处于越位位置，自然唔会去追个波，而广州足协个后卫见到李明向后行，大安旨意慢慢走去追个波，呢个时候冇越位嘅阿布力米提全速去追，由于广州个龙门完全冇提后面有鬼，结果系身位占优嘅情况下，个波居然被阿布力米提抢兼射入。
而上半场恒大其他有威胁嘅攻势都系如出一辙。恒大球员直接传身后搵李明，广州嘅后卫以为龙门出击处理，龙门又以为后卫清，结果个波俾李明抢走，好彩今次后卫马上将李明逼去窄角度，唔系输到0比2就冇后面反超嘅事啦。恒大上半场仲有一次有威胁嘅攻势，又系打身后，广州足协嘅龙门出击，点知同后卫撞埋一齐，好在个龙门多少接触到个波，令个波垫高咗，搞到阿布力米提原地咗360度先搵到个波，而广州足协嘅另一个后及时赶到清走咗个波。
上面就提到场面基本系广州足协占优，所以恒大拉唔开比分，注定俾追和，陆浩霖直塞身后，杨煜东系对方力逼下射门得手。而梁炬升反超嘅一球更加系世界波，系左路用右脚射远柱得手。
下半场一开始，恒大足校嘅势头比较猛，但过一段时间后广州足协又控制翻场面。比赛尾段随着换人同体能下降恒大足校又再次占优，但始终追唔和。
球员方面，广州足协嘅陆浩霖，梁炬升，侯煜表现几好，杨煜东，蔡安东次之。恒大足校方面嘅李明同阿布力米提表现较好。
队伍嘅对比上，广州足协除咗比赛尾段，基本压住恒大，进攻能力唔错，但龙门嘅气质同后卫嘅意识都唔掂，恒大足校方面，冇睇见西班牙传控或极强嘅个人能力，但球员起码冇咩低级错误。
