这是今仔(tann-á)伫别位拄著，我有做介绍的物件。
想讲就共做一寡仔补充，而且改用闽南语写，嘛共下伫遮，
做一个题目，分楼做一帖。
欲进入主题进前，我先用1楼共一寡仔相关的物件，
佮语文相关的一寡仔基本概念佮现象，做一下提醒。
首先 ---
伫人类知影会晓使用声音形态的「语」，语言，来互相表达意思了后无数千年，
人类才有才调用文字踮书面顶纪录语言，会当予语言/意思，
超越时间佮空间的限制的书面符号, 「文」，才有才调出现。
这是人类绁伫语言以后，阁一项的大进步。
声音形态的「语」，比书面型态的「文」较早出现真久；
声音形态的「语」词代先有，后面才缀咧有书面记录语词的「文」词。
书面的符号所欲代表的语音，是会当重新定义的，
像连拉丁字母abcd的各别字母的所代表的语音，会当毋是固定的，
阁愈免讲佮语音毋是缚足絚的各别汉字的语音，嘛是会当另外定义的，
虽然加减爱考虑著惯例/conventions。
语佮文，是俗成佮约定，做成一套，规套，
会当伫众人之间直接相通的声音佮文字符号。
A shared symbol system。
这是声音形态的「语」佮书面符号型态的「文」，
这两个虽罔关系足密切，毋过，是无同质的两个物件，
嘛是爱当做是有无仝概念来共怹看待的两个概念，
怹两个之间, 有前后关系。这是基准概念，出发点。
啊若汉字，
绝对毋是普通话的专用文字。
有表意作用，佮语音毋是缚甲足絚的汉字，
嘛绝对毋是拄仔会当用北京话来念，
毋是干焦有普通话音。
仝一个汉字，会用得有闽南语音，会使有粤语音，会当有普通话音，嘛会当有日语音。
仝一个汉字，伫无仝的语言内面，有无仝音。
仝一个汉字，伫仝一个语言，阁有勾破音佮文白异音(这伫普通话嘛有)；
甚至像伫日文内面，毋但有吴音/汉音/唐音佮训读音等等的念法，足复杂，上复杂,
犹阁有, 一个汉字，有训读来代表，来讲做毋但一个音节的，有几若个音节的现象。
例：「高」，日语音たか(taka)；「青」，日语音あお(ao)；「林」，はやし(hayashi)。
犹阁有像：「紫」，むらさき(murasaki)；雷，かみなり(kaminari)；
「诏」みことのり(mikotonori)；「志」こころざし(kokorozashi)，
一个汉字，有念做/代表四五个音节的现象。
顶面所讲的，是「语」佮「文」这两个有无仝概念的两种物件的基本现象，
以及汉字这个文字形式(script)，伫咧实际使用上的各种现象。
这号现象佮基本概念，请著爱先建立。
----------------------------------------------------
因为看过伤过济人，共「语」佮「文」的概念完全混滥 (尤其是伫用汉字做文的咱，观念上爱阁愈知影通好分)，加上予推普创甲共汉字当做是北京话/普通话语的专用文字，误认讲，汉字干焦有北京话音，所致爱先共语/文的一寡仔基本概念佮怹之间的关系，以及汉字佮语言的关系，犹阁一寡仔实际现象，做一下仔提醒佮强调。