【图片】《大时代》金句你识几多先？_大时代吧

神剧《大时代》第N次重播，啲人仍一窝蜂咁追住睇，开场五蟹跳楼嗰幕，今时今日睇仍觉非常震撼。《大》之可以成为神剧，内容精采兼有超强班底当然系主要因素，再加上剧中每集都有超爆金句，真系想唔赢都难。
我知我知，你对《大》嘅金句已经熟到烂吖嘛！但我死唔信你识得晒下面嘅金句罗。

金句王1：丁蟹（郑少秋饰）
今次金句大全以人物做分类。《大时代》最强金句王，丁蟹认第2，绝对冇人敢认第1（唔惊俾佢打傻咩）。呢条友狂躁、暴力、神经质，系个活喺自己世界，揸住自己成日搬龙门嗰套道德观嘅黐线佬，由於咁破格，佢绝对系电视史上最经典嘅人物之一！

「人善人欺天不欺，人恶人怕天不怕。」
呢句嘢本来出自明代儿童读本《增广贤文》，意思大家都明啦，简单讲系行得正企得正就冇有怕。讽刺嘅系被完全零道德嘅丁蟹攞嚟做人生「座右铭」，成日用呢句说话话刘松仁饰演嘅方进新虾佢，其实佢唔虾人都算偷笑啦！

「14年喇阿玲，我哋足足嘥咗14年喇！唔好再玩啦！」
丁蟹认为蓝洁瑛饰演嘅阿玲一直都钟意佢，於是扮晒情圣讲出上述肉麻嘅说话，事实阿玲最初系短暂对丁蟹有好感，但后来当然情倾有钱有型又好心地嘅方进新啦，从此对丁蟹又憎又怕，最后重想杀咗佢。
喂，俾我都想杀咗呢条扮情圣嘅癫佬啦！

「唔好惊，系技术性调整，唔好惊。」
大奇迹日，丁蟹5父子输凸全副身家，一向冇嘢惊嘅蟹哥终於崩溃，自己安慰自己咁讲。
「道义放两旁，利字排中间。」
呢，都话佢嘅道德标准成日搬龙门㗎啦！又一例子。
「你系咪神经失常呀？」
剧中最黐线嘅丁蟹闹人黐线，唔怪得啲人话黐线佬系唔会认自己黐线啦！

「总之记住，股票之道在於人弃我取。人哋买跌你一定要买升，咁就可以同其他人背道而驰，先可以大发。你几时见过成村人买股票会发？来来去去咪就系几个人。咁就证明大多数人嘅意见，未必系啱嘅。」
其实呢几句由韦家辉写出嚟嘅神级对白，套喺现实股坛都好啱用，喺剧中陈万贤因为成日被丁蟹打扰求教炒股心得，陈迫不得已就衍敷佢两句。

「咁多人死唔见你死！」
呢句陈万贤闹丁蟹嘅说话绝对系扭转套剧下半部分剧情嘅关键。
背景系陈万贤对於丁蟹已经好唔耐烦，於是臭口贤又出口术闹爆丁蟹，点知丁蟹就当正呢句系股坛黄金tips，喺股市大好形势下，人哋买升佢买跌，最后击败陈滔滔为方婷所做嘅收购战。

「趁地腍！」
同样系陈万贤闹丁蟹嘅说话，呢度要解释一下，「趁地腍」解作土地松软，土地松软可以做乜呀？就系易啲掘坑埋尸罗！所以呢句说话系非常恶毒嘅，叫人哋趁土地松软时去死：「要死就『趁地腍』啦！」

金句王3：方展博（刘青云饰）
呢位唔使多介绍啦，方进新（刘松仁饰）个仔方展博，炒股天才，同丁蟹斗足两代，最后同富豪借运win咗丁蟹，重win埋佢一家条命。

「我方展博要发达，我方展博要做亿万富豪。」
用念力无限loop催眠自己要发达报仇，重好似小学生咁罚炒添。

「升！升！升！升！升！」
丁蟹同方展博嘅最后对决，恒生指数经历大跌后，由9,000几点升至13,000几点，呢个日子被称为「大奇迹日」，呢日佢同陈滔滔（林保怡饰）一齐叫股市升，记得笔者当年都喺电视机前嗌埋一份。

值得一提嘅系刘青云喺刚刚第34届金像奖台上，多谢太太郭蔼明时，讲咗个「太空船论」。「每次当我揸住太空船，飞到宇宙唔知边度嘅时候，你总有办法令我安全返回地球。」
有网民就即刻联想到《大时代》中，方展博同龙纪文（郭蔼明饰）嘅说话。「我要买好大好大嘅飞机，我钟意飞就飞，去边就去边，但最重要系自己嘅家。」

好贴顶

《大时代》嘅金句当然唔止咁少，好似方进新嘅股坛朋友叶天（罗乐林饰），临死前传授方展博1首稀奇古怪的诗，叫「股票必胜法」：
「贪心输钱赢　输血不输钱　人人去输血　杀人不打风
落雨去离岛　离家饮炼奶　见人分遗产　出狱嫌钱腥
快乐冇人格　出家冇人工　攻而无不克　战无不胜矣」

最终方展博透过电脑分析「股票必胜法」，而家睇番都好有警世作用。意思如下：
「股市原意，乃让集资搜资有其地，社会向荣，人皆有赚，惜人性贪婪，耗尽心思，巧取豪夺，乐土成炼狱，血雨腥风，杀戮不息，无数人荡产倾家输性命，胜者则丧良知人格，余於股坛数十载，未尝见一真正赢者，智者应知此乃一处永无赢家之战场，取胜唯一法…『及早离去』4字而矣！」

另外方进新被丁蟹打到手脚唔协调，要做叠报纸搵食，但老细嫌佢慢，佢就讲咗以下呢番令人心酸嘅求情说话：「我被人打坏个脑，做得唔好。今日做唔好，唔要钱，听日做唔好，唔要钱。」松哥精湛演技加上呢句心噏对白，令当时唔少师奶喊湿几卷厕纸。

最夸张的是老螃蟹最后跟展博说那句”虽然我的几个儿子死得不明不白，但是我心中富有”，简直了。。。

顶

先顶了再看

日	一	二	三	四	五	六

《大时代》金句 你识几多先？

扫二维码下载贴吧客户端

《大时代》金句你识几多先？