『叱咤港乐』軒仔廣州開騷 觀眾齊齊爆粗

張敬軒以冒險家造型現身頒獎禮記招，他揹上背囊和手拿皮袋，可見他精心打扮過。
出動萬元皮袋
受訪時軒仔表示手拿的皮袋價值萬幾元：「個袋係尋日買，身上有啲配件都係今朝先搵出嚟，因為呢幾日都忙住廣州演唱會，不過好開心個演唱會反應好，我覺得自己做得好過同好睇過香港嗰個。」軒仔亦大呻廣州電視台和電台愈來愈不重視廣東話，但自己在演唱會上仍唱了八成廣東歌，而觀眾反應都很好。
廣州騷齊爆粗
軒仔又講到演唱會接近尾聲時問台下觀眾：「如果要講一個廣東話，最有力係咩字？觀眾就話係粗口，跟住我就話邊個粗口我唔知，你哋可唔可以講畀我知？跟住就全場一齊講咗一個字。」他亦透露一月會到澳門舉行演唱會，問到屆時可會重演萬人爆粗一幕？他笑言不會。至於問到對年尾頒獎禮可有信心？他坦言對歌曲獎項有信心，但對個人獎項就隨緣。