梁詠琪（GiGi）噚晚喺銅鑼灣出活動，GiGi最鍾意嘅節日就係聖誕節，佢話：「每一年我都好似垃圾婆咁，收集包裝紙同絲帶，喺聖誕就會DIY做聖誕裝飾，我老公隻腳好大，着46號，佢隻襪就用嚟放禮物，環保啲。」
GiGi又提到老公家鄉西班牙嘅習俗，每個家人都會送3份禮物畀小朋友，GiGi話：「我第一年都有follow㗎，不過覺得使唔使咁多？可以6合1就夠，唔使太多物質，有禮物當然開心，但係優質嘅親子時間更重要，去遊樂場玩一日，雖然攰過買禮物，但係有父母陪佢哋就開心。」GiGi話今年仲未準備禮物畀囡囡，不過o依家忙於為囡囡撲音樂劇飛，又要安排同小朋友聯誼開聖誕派對。
