当原初，温州城西有份做敲糖嘅人家。渠拉屋底总共有五个人，渠二老，儿，新妇，还有孙女。
个老老娘儿有个毛病，就是嘴馋显馋，特别喜欢吃敲糖。自拉毕竟是做生意嘅，敲糖是卖钞票用嘅。老老娘儿吃多爻，也会觉着孬意思。可惜，渠个人就是管不牢鼻头下面该一横儿。老老娘儿就偷偷能吃，不匄屋里人晓得。
有一日，日昼吃饭能界，个老老娘儿宿楼上走啊走不落。新妇伉孙女讲：“走上，逮娘娘叫落吃饭！”
孙女蹦蹦跳跳趞啊楼上，就赶紧望落趞。个娒娒儿边趞边叫：“阿妈，阿妈，冇解罢！娘娘变阿爷爻罢。”渠新妇趞楼上一眙，大家娘嘅嘴边敀起沃是棉花，就伉白殕冬瓜一色。原来个老老娘儿是搭偷成糖吃，吃起敀滋胶粘，眙孙女走来，就慌里慌张用棉花逮嘴缴缴爻。