早嗰排，大婆台嘅「木独佬」要去日本拍嘢，消息漏咗出嚟，当然有行家跟住去，睇吓执唔执到独家花絮猛料。当时「木独佬」啱啱同「放电蛇」甩拖，心情唔好，有晚拍完收工，「木独佬」冇跟大队，反而一支公去咗间餐厅食饭。个零钟后，「木独佬」埋单走人，点知就漏底咗个袋冇拎。行家见到，咪好心帮佢攞起，跟住打电话俾「木独佬」。行家话当佢一报上所属公司同自己个名咋，已经听出「木独佬」嘅语气好差。之后佢约行家喺佢住嘅酒店大堂见面。
行家话喺电话已经知「木独佬」寸，点知当口当面见到佢，原来仲样衰。「木独佬」见到行家时，已经玄坛咁面口，莫讲话笑容欠奉，仲连唔该都冇句即时抢番个袋。咁都算嘞，点知佢仲小人到第一时间打开个袋，睇吓有冇俾人摷过，仲边摷边话睇吓有冇唔见嘢喎。行家睇见佢个衰款，即时＊到爆炸。
行家到依家讲起呢单嘢，依然好气顶，仲话有日睇住佢踩屎都咪理佢，横竖都系咁臭咯。
唉，「木独佬」出名系三小；即系小家、小器兼小人。行家又唔系第一日识佢，使乜鬼咁劳气啫